Ciidamada dowladda federaalka oo ay la socdaan kuwa howlgalka Amisom ayaa weerar culus ku qaaday duhurnimadii maanta deegaanka Basra ee duleedka degmada Balcad, gobolka Shabeellaha Dhexe.
Dadka deegaanka ayaa VOA u sheegay in ciidamada is-garabsanaaya ay dhowr jiho ka weerareen saldhig ay al-Shabaab ku leeyihiin deegaanka Basra.
Wararka qaar ayaa sheegaya in uu jiro weerar dhinaca cirka oo howl-galka qeyb ka ah inkastoo aanu masuuliyiin si rasmi ah VOA ugu xaqiijinin arrintaasi.
Kooxda al-Shabab ayaa bilahii ugu dambeyay weeraro ka soo abaabulayay deegaanka Basra iyagoo wadada isku xirta Balcad iyo magaalada Jowhar ka dhigay maritaankeeda mid aad u halis badan marka ay timaaddo masuuliyiinta maamulka Hir-Shabeelle iyo ciidamada dowladda federaalka.
Ma jiro illaa iyo hadda war rasmi ah oo sheegaya qasaaraha ka dhashay weerarkaasi.