Madaxweynaha Soomaaliya Maxamed Cabdullaahi Farnmaajo ayaa sheegay in muddo laba sano gudahood ah ay dowladdiisu Al-Shabaab kaga xureyn doonto dhamaan meelaha ay haatan kaga sugan yihiin Soomaaliya, ayna ka hirgelin doonaan maamullo.
Madaxweynaha ayaa hadalkan ka jeediyey munaasabad lagu xusayay sanad-guurada 57-aad ee ka soo wareegtay aas aaska ciidanka xoogga dalka oo ku beegan 12-ka April, munaasabadaas oo maanta lagu qabtay magaalada Muqdisho.
Hadalka Madaxweynaha ayaa imanaya iyadoo dhawaan uu u qabtay maleeshiyada Al-Shabaab inay isu soo dhiibaan dowladda muddo 60 maalmood ah, kuna dhawaaqay in dalku uu galay xaalad dagaal.
Wixii ka dambeeyay waqtigaas Al-Shabaab ayaa qaraxyo dhowr ah ka fulisay magaalada Muqdisho ee caasimadda Soomaaliya.
Warbixintan waxaa Muqdisho kasoo diray Xasan Kaafi Qoyste