Xildhibaannada Golaha Shacabka ee Baarlamanka Soomaaliya ayaa maanta meel-mariyey Hindisa Sharciyeedka La-dagaallanka Argagixisada, oo muddo horyaallay golaha.
Sharciga ayaa waxaa u codeysay 133 xildhibaan, waxaa ka aamustay 7 xildhibaan, waxaa diiday 3 xildhibaan. Kulanka ayaa waxaa xaadiray 143 mudane.
Wasiiru dowlaha amniga gudaha xildhibaan Maxamed Cali Xagaa ayaa bogaadiyey meel-marinta sharcigan, wuxuuna sheegay inuu muhiim u yahay “ka hortagga iyo dabar-goynta argagixisada.”
Waxaa sidoo kale ansixinta sharcigan bogaadiyey taliyaha hay’adda Nabad-Sugidda iyo Sirdoonka Qaranka Soomaaliya (NISA), Mahad Salaad.
“Sharcigan waxa uu laf-dhabar u yahay dagaalka aan kula jirno argagixisada, waxa uuna kusoo beegmay xilligii aan ugu baahida badnayn si aan u gudanno waajibaadka naga saaran ka-hortagga Khawaarijta iyo ciribtirka fal-dambiyeedyada la xiriira argagixisada,” ayuu Mahad Salaad ku yiri qoraal lasoo dhigay bogga twitter-ka ee NISA.
Mahad Salaad ayaa sidoo kale ka codsaday xildhibaannada Aqalka Sare inay ansixiyaan sharcigan.