Hoggaamiyaha sare ee dalka Iran Ayatullah Khameinei ayaa sheegay in wadahadallo kasta oo mustaqbalka Iran la yeelan doonto Mareykanka ay noqon doonaan kuwo ku saabsan oo kaliya heshiiska hubka Nuclear-ka balse aysan shaqo ku lahaan dooni arrimo kale.
Bayaan maanta oo Arbaco ah lagu daabacay website-ka Ayatullah Khameinei, ayuu ku sheegay in uu oggolaaday wadahadallada lala galay dalka Mareykanka, balse ay gaar ku yihiin oo kaliya hubka Nuclear-ka.
Dalalka Iran, Mareykanka iyo shanta waddan ee wada hadallada hubka Nuclear-ka Iiraan ku weheliya Mareykanka, ayaa bishii July gaaray heshiis la xiriira barnaamijka nuclear-ka ee Iran.
Madaxweynaha dalka Iran Xasan Rooxaani oo ah nin qunyar socod ah marka la barbardhigo Ayatullah Khameinei ayaa talaadadii sheegay in Tehran ay diyaar u tahay in ay Mareykanka kala hadasho sidii xal waara loogu heli lahaa dagaalka sokeeye ee ka socda dalka Syria.
