Isku xirrada

Lacagta Xubinimada QM ee Soomaaliya lagu Leeyahay


Qoraal lagu daababay bogga Qaramada Midoobay, kaas oo ku taariikhaysan 07 September 2017, kana soo baxday xafiiska Xoghayaha Guud ee Qaramada Midoobay ayaa lagaga hadlay illaa afar dal oo lagu leeyahay lacag oo ay ku jirto Soomaaliya.

Qoraalka ayaa lagu soo xigtay qodobka 19aad oo dhigaya in dalalka lagu yeesho lacagta qaadhaanka ah ee xubinimada dalka, muddo laba sannadood ah, inuu dalkaasi waayi kari karo xaqqii uu u lahaa inuu codeeyo, haddii dalkaasi aanu la iman sabab macquula oo keentay inuu lacagta iska bixin kari waayo, isla markaana Golaha Sare uu ku qanco.

Danjiraha Soomaaliya u fadhiya Qaramada Midoobay oo la hadlay VOA ayaa sheegay inuu arkay waraaqdan, hase ahaatee aanu hubin inay sax tahay iyo inkale.

Danjiraha ayaa sheegay inay jirto in Somalia lagu leeyahay lacagihii qaadhaanka ahaa ee dal ahaan looga rabay, taas oo aan 15-kii sano ee ugu dambeeyey aan la bixinin.

Danjiraha ayaa sheegay inay sannad walba codsanayeen in dib loo dhigo bixinta lacagtaas, sannadkanna ay sidaas sameeyeen.

Wuxuu meesha ka saaray oo been ku tilmaamay in loo diiday Soomaaliya inay golaha loo dhan yahay ee Qaramada Midoobay inay ka hadlaan ama inay codeeyaan.

Danjiraha Soomaaliya u jooga Qaramada Midoobay ayaa u waramay weriyaha VOA Sahra Cabdi Axmed.

Facebook Forum

XS
SM
MD
LG