Ka dib markii uu dhaleecayn kala kulmay qaar badan oo ka mid ah xisbigiisa iyo dadka u dhaq-dhaqaaqa qaxootiga, ayuu Aqalka Cad sheegay in madaxweyne Joe Biden uu bisha danbe qaadi doono go’aankii uu madaxweynihii isaga ka horreeyay ku yareeyay tirada qaxootiga uu dibadda ka soo qaado Mareykanka.
Tani waxay ka danbeysay markii uu Biden shalay saxiixay wareegto uu maamulkiisu ku sheegay in uu raaci doono siyaasaddii qaxootiga ee madaxweynihii hore ee Mareykanka Trump, taasoo dhigeysay in qaxootiga ay dowladda Mareykanka soo qaadato sanadkii aysan ka badnaan 15 kun oo qof.
Haseyeeshee cadaadis xoog leh oo qaar ka mid ah Dimuqraadiyiinta kaga yimid madaxweyne Biden ayuu isla Jimcihii shalay uga laabtay go’aankaasi.
Bayaan ka soo baxay Aqalka Cad ayaa lagu sheegay in madaxweyne Biden uu 15-ka bisha May kordhin doono tirada qaxootiga sanadkii imaan doona Mareykanka.