Madaxweynaha Ciraaq Fouad Massoum ayaa ra'iisul-wasaare u magacaabay Haider al-Abadi, wuxuuna amray inuu soo dhiso xukuumad cusub.
Al-Abadi wuxuu ahaa guddoomiye-ku-xigeenka baarlamaanka Ciraaq, waxaana soo magacaabey ururka Shiicadda "National Alliance", isagoo baddali doono Nouri al-Maliki.
Talaabadan ayaa imanaysa iyadoo al-Maliki uu isku dayay inuu xukunka sii hayo, isagoo iska dhagamarinaya baaqyada ka imanaya Sunniyiinta, Kurdida iyo Shiicadda kale oo isaga ugu baaqay inuu xilka ka dago.
Haider al-Abadi, waa Enjineer wax ku soo bartay jaamacad ku taalla magaalada Manchester ee dalka Britain.
John Kerry, xoghayaha arrimaha dibedda Maraykanka ayaa sheegay in dhismaha xukuumad cusub ay muhiim u tahay xasilloonidda Ciraaq, wuxuuna ku booriyay al-Maliki inuu ka baaqsado inuu xaaladda sii murgiyo.