Ugu yaraan 25 qof ayaa la sheegayaa inay ku dhinteen dagaallo xooggan oo saaka aroortii ilaa maanta ka dhacayay tuullo lagu magacaabo CEEL LA HELAY oo u dhaxeysa magaalada Dhuuse Mareeb iyo degmada Ceelbuur ee bartamaha Somalia.
Dagaalladan oo u dhaxeeyay maleeshiyooyinka Al-Shabaab iyo Ahlu-Sunna ayaa ka bilowday kaddib markii maleeshiyada Ahlu Sunna ay duqeyn iyo weeraro la beegsadeen deegaanka GOD-DHURWAA oo qiyaastii 40 km dhinaca barri kaga toosan magaalada Dhuuse-mareeb, halkaasoo fadhiisin u ahayd maleeshiyada Al-shabaab.
Iyadoo ay adag tahay in warar faahfaahsan laga helo goobaha dagaalka iyo khasaaraha rasmiga ee u dhaliyay , ayaa haddana warar kale duwan oo ay VOA-du helayso ay sheegayaan in tiro maydad ah iyo tiro dhaawacyo ahba oo ka tirsan labada dhinac la gaarsiiyay deegaanka Wabxo, CeelBuur iyo Dhuusa-Mareeb.
Wararka ugu danbeeyay ayaa sheegaya in xaaladdu haatan yara qabowday, inkastoo la maqlayo mar-marka qaar, dhawaaqyada madaafiic ay labada dhinac isku tuurayaaan.