Ururka Ahlu-Sunna iyo al-Shabaab ayaa maanta dagaal ku dhexmaray deegaanka Kalabeyr ee u dhaxeeya Garbahaarey iyo Buurdhuubo ee gobolka Gedo.
Dagaalka ayaa qarxay ka dib markii xoogga Ahlu-Sunna Waljamaaca ay weerareen deegaankaasi ay horey u joogeen kuwa al-Shabaab.
Dad goobjoogayaal ah waxay sheegeen in ugu yaraan 5 ruux ay ku dhimatay dagaalkaasi. Labo ka mid ah dadkii dhintay waxaa la sheegay inay ahaayeen dad rayid ah.
Dhowaanahan waxaa gobolka Gedo ka dhacayay dagaalo u dhaxeeya ciidamada dowladda KMG ah iyo kuwa Ahlu-Sunna Waljamaaca oo isku dhinac ah iyo kooxda al-Shabaab.
Dagaaladaasi ayay ciidamada dowladdu kula wareegtay dhulal istaraatiiji u ahaa kooxda al-Shabaab oo ay ka mid yihiin Garbahaarey iyo Beled-Xaawo.