Milatariga Philippine ayaa dilay taliye muhiim ah oo ka tirsanaa kooxda mintidiinta ee Abu Sayyaf, sida uu maanta sheegay madaxa milatariga dalkaas.
General Eduardo Ano ayaa shaaca ka qaaday in milatariga ay meydka Moammar Askali, oo sidoo kale loo yaqaan Abu Rami ka heleen xaafad ku taalla jasiiradda Bohol, halkaasi oo ciidamada Philippine ay kula dagaalamayaan dagaalyahanada Abu Sayyaf.
Askali ayaa waxaa lala xiriiriyey afduubka iyo gowraca laba qof oo u dhashay dalka Canada, sanadkii tagay, iyo qof u dhashay dalka Jarmalka oo la dilay bishii Febraayo.
Milatariga ayaa sheegay in Abu Sayyaf ay isku dayayeen inay gaystaan afduubyo cusub markii ay doon ku yimaadeen magaalada Inabanga oo ku taalla jasiiradda Bohol ee koonfurta Philippine, halkaasi oo kooxda ay ka howlgasho.
Dagaalka ayaa qarxay markii ciidamada dowladda ay halkaas u tageen inay baaraan arrintan, waxaana maanta halkaas ku dhintay lix ka tirsan mintidiinta, saddex askari iyo nin boolis ahaa.
Milatariga ayaa sheegay in dagaalka uu weli socdo, islamarkaana ay cayrsanayaan qaar ka mid ah mintidiinta.