Ururka al-Shabaab ayaa caawa fiidkii laba weerar ku qaaday hotelada Weheliye iyo Siyaad ee magaalada Muqdisho.
Dableyda ayaa Weheliye Hotel ku weeraray qarax baabuur, kadibna damcay inay gudaha u galaan, balse uma suurtagalin kadib markii ay ka hortageen ciidamada hotel-ka iyo kuwa amniga ee dowladda Soomaaliya.
Maxamed Cumar Ceymooy, wasiirka kaluumaysiga ee Soomaaliya oo ka mid ahaa saraakil ku jiray gudaha hotel-ka ayaa VOA u sheegay in qarax weyn albaabka hotel-ka lala beegsaday, ciidanka amnigu ay hor istaageen in dableydu ay gudaha u gasho hotel-ka.
Wasiirka ayaa sheegay in wakhtiga weerarka ay gudaha hotel-ka ku jireen wasiirro, xildhibaano iyo saraakiil ka tirsan dowladda.
Sidoo kale, maleeshiyada al-Shabaab ayaa weeraray oo gudaha u galay Siyaad Hotel oo u dhow madaxtooyada Soomaaliya.
Wararka ayaa sheegaya in maleeshiyadu ay wali ku jiraan gudaha hotel-ka, waxaana weriyayayaasha VOA ay ku soo warramayaan in hotel-ka gudihiisa laga maqlayo rasaas iyo qaraxyo.